g11n.net - comunidade de galeguización

Novidades sobre a plataforma

2011-04-29T18:51:00.000-07:00

Transcurrido un tempo prudencial, semella seguro afirmar que o proceso de devolución ao voluntariado da coordenación dos proxectos de software libre que motivou a posta en marcha desta plataforma foi finalizado, e que o traspaso das responsabilidades de coordenación deses proxectos foi realizado de forma efectiva. Resolta pois a urxencia causada polo desmantelamento de Mancomún, parece chegado o momento de permitir que a plataforma continúe coa súa propia evolución, desactivando aqueles servizos que son menos necesarios e redimensionando aqueloutros que mellor respondan ás necesidades que se foron destilando desta demorada posta en común.

Como ponto de encontro para a galeguización de programas e contidos informáticos, a plataforma g11n.net xa non debe por mais tempo continuar únicamente circunscrita ao específico ámbito do software libre, ao tempo que debe comezar a respostar ás inquedanzas do perfil técnico, científico e profesional que caracteriza a boa parte das personas congregadas en torno a esta iniciativa. Distintos ámbitos como a lingüística computacional, a tradución e a interpretación, as iniciativas de dinamización do idioma ou as políticas de normalización levan anos acollendo iniciativas que poden beneficiarse das sinerxías xeradas pola posta en común e o contacto interdisciplinar que quere fornece esta plataforma.

Trátase pois de redimensionar o proxecto para acoller unha aposta a longo prazo que durante os próximos anos non teña outro obxectivo que o de consolidarse paseniñamente mediante a progresiva agregación de vontades orientadas, colectivamente, a garantir a viabilidade da cultura galega na sociedade da información e do coñecemento. Os principais cambios e novidades irán aparecendo en forma de comentarios a esta mensaxe. Suxerencias e ideas, como sempre, serán benvidas.

Queremos galego como lingua preferente nos portátiles da Xunta

2010-09-17T15:55:00.000-07:00

Alerta pola exclusión do galego nos portátiles educativos da Xunta.
O galego debe ser incluído nos portátiles das escolas como lingua preferente.
A Xunta despreza o traballo de tradución realizada polo voluntariado.

A comunidade de galeguización da informática g11n.net quere alertar a todas as persoas preocupadas polo futuro do noso idioma acerca da decisión tomada pola Xunta de excluír o galego nos portátiles que a Consellaría de Educación distribuirá nos centros educativos.
O pasado luns 13 de setembro o director xeral de Educación, Jose Luis Mira, reuniuse cos directores dos centros que implantarán os portátiles neste curso. A partir deste encontro os directores dos centros e personal vencellado puideron visitar e probar in situ o modelo de aula xa equipada cos portátiles que serán distribuídos. Para sorpresa das persoas que probaron este modelo de aula, os ordenadores podían empregarse en castelán e tamén en inglés pero non era posíbel facelo en galego, sen que exista razón técnica algunha que poida xustificalo.
É a Consellería de Educación quen define as características que deben cumprir os ordenadores, entre elas as relativas á configuración de lingua. Se a empresa adxudicataria non incluiu o galego nos portátiles das escolas foi porque a Consellaría non lle esixiu facelo. Atopamos completamente inaceptábel que a Xunta valide para a súa presentación pública un modelo de aula dixital que exclúe a nosa lingua, máxime cando hai dispoñíbel libremente unha versión do sistema informático empregado plenamente operativo en galego grazas ao traballo da comunidade galega de tradución.
Pensamos que os ordenadores das escolas deben empregar o idioma propio do país de xeito preferente e de forma que sexa posibel escoller alternativamente outros idiomas como o español ou inglés. Esta configuración resultaría coherente ademais coa vontade expresada polos tres grupos parlamentarios PP, PSOE e mais BNG para que o galego sexa a lingua xeral de referencia no ámbito da administración pública.
Dende a comunidade de galeguización da informática g11n.net queremos apelar especialmente as personas mais vencelladas co sistema educativo (profesorado, nais e pais ou consellos escolares) para que fagan chegar á Xunta a súa preocupación por estes feitos e soliciten por escrito que o galego sexa o idioma preferente nos ordenadores do sistema educativo galego.
Mais información sobre a presentación do modelo de aula na web da Xunta.

Disfrázate de OpenOffice 3.2 neste antroido!

2010-02-12T15:54:00.000-08:00

Tras un longuísimo proceso de testaxe e de probas para asegurar a súa máxima calidade, xa se pode descargar a versión 3.2 de OpenOffice en galego. Sen lugar a dúbidas, trátase da mellor versión deste completo pacote ofimático tanto no aspecto técnico cunha impresionante mellora na súa velocidade de funcionamento, como tamén no aspecto lingüístico, acadando prácticamente o 100% da tradución da axuda no noso idioma grazas á comunidade galega de tradución e moi particularmente á personal adicación do filólogo Antón Méixome.
A igual que viñamos avisando nos anuncios do Thunderbird e do Firefox, esta versión aparece no medio dun proceso de cambio na coordenación do proxecto causada polo desmantelamento de Mancomún iniciado polo Partido Popular, e que provocou o abandono por parte da Xunta das traducións que viña realizando.
Por este motivo, aínda que o exhaustivo proceso de probas dirixido por Sun Microsystems garante a máxima calidade do produto, aínda non puidemos actualizar a web oficial da versión galega do OpenOffice. Agardamos logralo nos próximos días, mais non queremos que ninguén perda a ocasión de actualizar o seu OpenOffice -cousa que recomendamos encarecidamente- de maneira que aquí deixamos as ligazóns de descarga para as plataformas mais difundidas:

Descargar OpenOffice.org 3.2 para Windows
Descargar OpenOffice.org 3.2 para Linux tipo DEB (como Debian/ Ubuntu/ Galinux...)
Descargar OpenOffice.org 3.2 para OSX tipo Intel

Ademais, existen versións para outros tipos, como 64 bits -tanto en Linux como en Windows-, tamén RPM para Linux tipo RedHat/ Mandriva, para OSX tipo PPC así como versións para Solaris -tanto para máquinas Sparc como x86- que poden atoparse na páxina global de descargas de OpenOffice.org. Tamén nesa web poderemos atopar a versión para outros idiomas próximos como o Portugués (Europa ou Brasil) e tamén español.
Anímate a disfrazarte de OpenOffice.org 3.2 neste anrtoido!!

Descarga Firefox no teu móbil!

2010-01-28T15:55:00.000-08:00

Xa se pode descargar o Firefox para móbiles, a primeira versión de Firefox específicamente deseñada para funcionar en dispositivos móveis con pantalla táctil. Novamente poderemos desfrutar deste avanzo tecnolóxico grazas ao traballo da comunidade galega de tradución, e moi especialmente o de Manuel (Ifrit) que se encargou da tradución e do filólogo e traductor profesional Manuel Souto Pico (Xinelo) que levou a cabo a revisión lingüística.
Trátase do Firefox de sempre, redeseñado para funcionar mellor no teu dispositivo móvil. En principio esta versión funciona para dispositivos con Maemo de Nokia e tamén con Windows Mobile, se ben esta última opción aínda terá que agardar uns meses.
En cambio, a versión para Maemo de Nokia xa é plenamente funcional e vai moi pero que moi ben! Se tes un móbil con Maemo, como o Nokia N900 ou N810, só tes que introducir o teu número de móbil e a Fundación Mozilla enviarache gratuitamente ao teu móbil o enderezo para descargalo.
Lembra tamén que o plugin de Flash ven desactivado por defecto, pero funciona ben en páxinas como YouTube; atoparás na axuda instrucións para activalo se queres facelo, en modo avanzado.
Así que xa podemos desfrutar do Firefox no noso dispositivo táctil! Coa túa axuda acadaremos que progresivamente vaia estando dispoñibel nun número cada vez maior de móbiles e plataformas.

Acaba de saír o Firefox 3.6 en galego

2010-01-22T15:53:00.000-08:00

Xa se pode descargar o novo Firefox 3.6 no noso idioma. Trátase dunha versión moi mellorada do navegador mais popular que incorpora novas e importantes melloras: un 20% mais de velocidade, maior comodidade na apertura de novos separadores (ábrense ao lado do separador actual en troques de abrirse ao final de todo) e mais de 6.000 complementos gratuitos cos que personalizar o seu funcionamento.
A igual que xa fixeramos co Firefox, compre avisar que aínda que todo debería ir ben, existe a posibilidade de que aparezan problemas coa tradución galega do Thunderbird. O motivo non é outro que o proceso de desmantelamento de Mancomún iniciado polo PP dende que chegou á Xunta, que provocou a interrupción do traballo de tradución iniciado polo personal do CESGA, e que xa non poderá continuar.
Dende a plataforma g11n.net faremos todo o posibel por resolver problema calquera problema que poida xurdir, para o que vos pedimos que si detectades calquera erro enviedes notificación ben á rolda de coordenación de Mozilla (no correo electrónico galician@mozdev.org ) ou ben deixando unha mensaxe no foro comunitario g11n.net.
A desfrutar do mellor navegador do mercado!

Xa temos Songbird 1.4.3 en galego

2010-01-11T15:51:00.000-08:00

Chéganos aviso de Carlos Neira Cortizas da tradución ao galego do Songbird 1.4.3.Trátase dun reprodutor multimedia baseado no software de Mozilla que funciona moi ben. Grazas Carlos!! Esta era a súa mensaxe:

Ola a todas/os

Estréome na rolda de correos anunciándovos a localización ao galego da

última versión do Songbird, aplicación baseada en Mozilla para a

reprodución e xestión de bibliotecas multimedia. Publiquei o anuncio en

http://calidonia.eu/ Naturalmente calquera comentario ou corrección será

benvida pois eu non puiden testar todas as funcionalidades.

Un saúdo

Carlos Neira Cortizas

---------------------
http://calidonia.eu/
Tel: +34 669 829 373

Constitúese a Asociación Proxecto Trasno

2009-12-21T15:50:00.000-08:00

Chégannos boas novas a traverso da nosa rolda comunitaria: tras un longo proceso de reflexión e papelame, ven ao mundo unha nova asociación vencellada ao software libre e ao galego. Trátase do grupo Trasno (acrónimo de TRAdutores Sen NOme (Trasno) que tras varios anos de traballo en localización decidiu dotarse de personalidade xurídica.
Coa chegada de Trasno, xa somos dúas alomenos as asociacións que traballamos na rede a prol do galego... seremos ecapaces de establecer vínculos de coordenación, ou estaremos abocados inevitabelmente a un novo exercizo do minifundismo mental?
O tempo falará por sí mesmo, mais de momento o que toca é darlle a benvida aos novos e desexarlles o mellor no seu traxecto. Eis a mensaxe que enviou o seu director:

Compráceme informar de que:

A «Asociación Cultural para a Galeguización de Software Libre Proxecto Trasno»
con domicilio social no nº 28 da rúa A Plaza, Figueroa, Abegondo (A Coruña)
foi inscrita no Rexistro Central de Asociacións co nº 2009/013660-1 (SC) e
asignóuselle o NIF G70234315, co cal a asociación queda legalmente
constituída.

A asociación, sen ánimo de lucro, representa legal e economicamente ao
Proxecto Trasno e, en xeral, pretende ser a entidade que axude e soporte á
comunidade de localizadores ao galego.

Animo a todos aqueles que estiverades a localizar ou a axudar na localización
de software libre ao galego, ou a todos os desexedes facelo, a vos asociar,
participar nas decisións da asociación e contribuír nos obxectivos que nos
marcamos. Sodes máis que benvidos.

Tedes esta información ampliada en http://trasno.net/trasno:asociacion

Atentamente,

Miguel Branco

Xa temos o Thunderbird 3 en galego

2009-12-09T15:52:00.000-08:00

A Fundación Mozilla acaba de anunciar a publicación da última versión de Thunderbird, o programa libre de correo electrónico rápido, flexibel e seguro. E grazas á comunidade galega de tradución, podemos descargalo dende xa en galego.
Aínda que todo debería ir ben, queremos avisar da posibilidade de que aparezan problemas coa tradución galega do Thunderbird. O motivo non é outro que o proceso de desmantelamento de Mancomún iniciado polo PP dende que chegou á Xunta, que provocou a interrupción do traballo de tradución iniciado polo personal do CESGA, e que xa non poderá continuar.
Dende a plataforma g11n.net faremos todo o posibel por resolver problema calquera problema que poida xurdir, para o que vos pedimos que si detectades calquera erro enviedes notificación ben á rolda de coordenación de Mozilla (no correo electrónico galician@mozdev.org) ou ben deixando unha mensaxe no foro comunitario g11n.net.

Estamos a probar o Pootle na plataforma g11n.net

2009-12-08T15:50:00.000-08:00

Onte anunciabamos o lanzamento da versión 2.0.0 do Pootle... Despois dun mes de posta en común e dunha intensa e divertida noite de traballo, conseguimos instalar este servizo de tradución colaborativa.
http://traduce.g11n.net/
Axúdasnos a probalo? Rexistra unha conta -é automático- e proba o servidor; se tes calquera dúbida ou detectas calquera problema, só avísanos no foro comunitario da plataforma g11n.net

Publicada a versión 2.0.0 de Pootle

2009-12-07T15:49:00.000-08:00

Hoxe foi publicada de forma oficial a nova versión (2.0.0) de Pootle, un sistema web de axuda á tradución. Algunhas das principais melloras que incorpora esta versión son:

Nova interface de usuario, máis bonita e configurábel e con mellor xestión das contas. Inclúe información útil para o tradutor como a coincidencia con entradas dun glosario terminolóxico.
Melloras na xestión da interface web, con diferentes perfís de administración.
Integración co Translate Toolkit, o que permite amosar estatísticas e empregar técnicas de QA nas traducións.
Maior rendemento: soporte para un maior número de usuarios concurrentes, melloras na indexación dos textos (mediante Xapian ou Lucene), etc.
Outras melloras técnicas:
- Posibilidade de usar LDAP para a autentificación de usuarios.
- Uso como aplicativo independente ou servido por Apache.
- Pode usar moitos motores de bases de datos, ademais de MySQL.

Pódese consultar tamén unha lista completa de características do aplicativo.

Pode descargar esta nova versión na páxina oficial de descarga de Pootle en SourceForge.

Publicada a versión 0.5.0 de Virtaal

2009-12-03T15:48:00.000-08:00

Hoxe foi publicada de forma oficial a nova versión (0.5.0) de Virtaal, a ferramenta de axuda á tradución. As principais melloras que incorpora esta versión son:

Mellor integración das bases de datos terminolóxicas mediante AutoTerm, que agora permite o uso destas fóra de liña unha vez descargadas.
Procura na web: permite seleccionar texto e procuralo nun sitio web.
Marcado de diferencias nas coincidencias parciais coa TM.
Melloras nas consultas a Open-Tran.
Identificación de lingua
Novos plugins para facer uso de motores de tradución automática (Google e Moses).
Solucións a erros detectados na versión anterior.

Pódese consultar tamén unha lista completa de características do aplicativo.

O paquete está dispoñíbel xa para descarga.Os usuarios de Linux teñen que ter en conta que para poder utilizar a última versión de Virtaal deberán así mesmo actualizar o Translate Toolkit.

Joomla! 1.5.15 en galego

2009-11-15T15:47:00.000-08:00

Informa Daniel Munhiz no seu blog de que ven de anovar a versión dos paquetes de galego para o Joomla! á versión actual que é a 1.5.15. Preme aquí para descargalos. Parabéns polo traballo a Daniel Muñiz.

Chamamento: verificación do novo OpenOffice 3.2

2009-11-15T15:46:00.000-08:00

Acaba de ser publicado nos foros de g11n.net o seguinte chamamento para colaborar no proceso de verificación da futura versión de OpenOffice.org, a nova 3.2. Na mensaxe indícase cómo descargar o programa para probalo. O prazo para facer a verificación finaliza este mércores 18 de novembro de 2009.

A seguir reproducimos o texto da mensaxe publicada nos foros:

Ola!

Queres axudarnos a probar o novo OpenOffice.org 3.2 no teu idioma? Entón segue a ler:

Acaba de ser publicado un adianto da próxima versión de OpenOffice.org que, grazas ao traballo comunitario, incorpora xa a súa tradución ao noso idioma. Trátase dunha versión de probas que nos permitirá verificar o seu correcto funcionamento e resolver así calquera problema grave antes de que se produza a publicación da súa versión oficial.

Dende a equipa de galeguización de OpenOffice.org queremos pedir a túa colaboración para axudarnos nesta importante tarefa. O proceso é moi sinxelo: consiste en:

Instalar (ver nota a pe de paxina [1]) o aplicativo (Linux ou Windows)
Probalo (por exemplo entrando nos menús, consultando a axuda, premendo os botóns, examinando os cadros de diálogo...) e finalmente:
Avisarnos por correo no enderezo dev@gl.openoffice.org de calquera erro grave que puideras detectar.

Lembra que o prazo para a recepción de erros finaliza o próximo mércores 18 de novembro de 2009, polo que só temos esta semana para verificar o seu funcionamento.

Grazas dende xa pola túa colaboración!
--

[1] Lembra que se trata dunha versión de probas e por tanto que debes extremar as precaucións, especialmente poñendo a salvo a túa configuración e os teus ficheiros e desinstalando as versións anteriores do aplicativo antes de instalar esta versión de probas. Podes descargar a versión de probas para Linux (DEB ou RPM) e tamén para Windows nas seguintes ligazóns:

Instalador para Windows: http://ooo.services.openoffice.org/pub/ ... all_gl.exe
Instalador para Linux DEB (tipo Debian, Ubuntu e similares): http://ooo.services.openoffice.org/pub/ ... deb.tar.gz
Instalador para Linux RPM (tipo RedHat, Mandriva e similares): http://ooo.services.openoffice.org/pub/ ... _gl.tar.gz

Fonte: http://foros.g11n.net/viewtopic.php?f=19&t=30

Novo recurso lingüístico liberado polo CIRP

2009-11-12T15:45:00.000-08:00

O Centro Ramón Piñeiro para a Investigación en Humanidades acaba de liberar un novo recurso lingüístico baixo a licenza LGPLLR. Trátase dun corpus etiquetado morfosintacticamente e revisado a man que inclúe aproximadamente 300.000 formas tomadas de textos xornalísticos. Está dispoñíbel para descarga en:

http://corpus.cirp.es/xiada/corpus_xiada_2_3.tar.gz

Até agora xa era posíbel o acceso ao corpus mediante a ferramenta web de procura presentada hai uns meses.

Este recurso pode resultar moi útil á hora de mellorar as ferramentas lingüísticas que existen na actualidade, ou para adestrar modelos estatísticos.

A nova foi anunciada na lista corpora.

A Xunta xa non controla o Firefox en galego

2009-11-05T15:44:00.000-08:00

Manuel Vilas . As dúbidas sobre Mancomun levan os activistas do software libre galego a traballar á marxe do Goberno. Un membro da plataforma G11n consegue o recoñecemento internacional como responsábel da galeguización dos principais programas libres: o navegador Firefox, o paquete de oficina OpenOffice.org e o entorno gráfico GNOME.

“G11n non é unha nova organización, senón unha plataforma para ofrecerlles os recursos aos que queiran traballar no software libre galego”. Son palabras de Alexandre Prieto, voceiro deste novo colectivo que naceu para que non se perdan os avances logrados no software libre galego nos últimos anos.

Prieto explica que “co cambio de Goberno quedou claro, vistos os despedimentos e os orzamentos, que Mancomun.org ficará só como un páxina web de noticias, polo que temos que reorganizarmos”.

Mozilla e Sun xa non recoñecen a Xunta como coordinadora

Nesa reorganización inscríbese o cambio da titularidade oficial da galeguización dos programas libres. A fundación Mozilla (responsábel do Firefox), Sun Microsystems (responsábel do OpenOffice) e o proxecto Gnome xa non recoñecen como representante oficial a Xunta senón a Suso Baleato, un dos membros máis implicados na plataforma.

Dende G11n explicase que deste xeito evítase que, ante as dúbidas mostradas polo Goberno neste asunto, as traducións ao galego de programas abertos fiquen sen recoñecemento internacional, tal e como pasou durante media década co Firefox.

De feito, as novas versións en galego deste navegador, que xa usa máis do 20 por cento dos internautas, e do OpenOffice.org xa están “no forno”.

Iso si, os activistas insisten unha e outra vez en que “o proxecto está nacendo” e que G11n está aberto a participación de todos. Polo de agora, xa son unhas cincuenta persoas as que colaboran.

Implicación da Ciberirmandade

Fano a través de dous servidores de gran capacidade, listas de correo, unha wiki que comezará a funcionar proximamente, un servidor web, un repositorio para os códigos e foros.

O custe destas ferramentas calcúlase en 5.000 euros para dez anos. Polo de agora os cartos saíron de donativos dende a Ciberirmandade (a comunidade virtual de activistas a prol do galego na informática) e de achegas dos propios voluntarios.

Fonte: A Nosa Terra: http://www.anosaterra.org/nova/36959/a-xunta-xa-non-controla-o-firefox-en-galego-.html

Método de galeguización

2009-11-03T15:42:00.000-08:00

Estes días atrás estivemos a traballar na sistematización dun método de galeguización que puidese servir de referencia de entrada para a xente nova interesada en colaborar, á vez que poida valer para que todos nós teñamos máis claro cales son os pasos comúns ao proceso de tradución (alén das particularidades de cada proxecto).

Podes consultala en:

http://repositorio.g11n.net/l10n/doc/estratexias/

Queremos compartilo aquí para así poder mellorala coas achegas de todos, a través dos foros.

Chamamento para a tradución de GNOME (versión 2.30)

2009-11-02T15:44:00.000-08:00

Acábase de abrir o prazo para a tradución da versión 2.30 de GNOME, un contorno de escritorio intuitivo e de uso doado. O equipo de galeguización de GNOME querémosche facer este convite para que colabores connosco nesa tarefa.

Queres axudar? É ben doado! Explicámosche cómo facelo:

A- Envía unha primeira mensaxe á nosa rolda oficial de coordinación [1] contándonos algo sobre ti (tes algunha experiencia traducindo? Que te motiva a colaborar? sempre axuda saber algo de cada un de nós!) e indica se prefires participar traducindo, revisando ou colaborando doutro xeito -se cadra no wiki, cazando erros ou en calquera outro aspecto do proxecto. Desta maneira poderemos asignarche o rol correspondente e darche a información adecuada sobre cuestións importantes como estilo de correción lingüística ou as ferramentas que adoitamos empregar.

B- Mentres agardas pola resposta [2!!], podes ir botándolle un ollo ao traballo que temos pendente. Para esto visita o web oficial do noso equipo [3] e observa a táboa na que se relacionan as distintas versións. Agora estamos a traballar na versión 2.30, que é onde máis produtivo resultaría o teu traballo.

En cada unha das filas desa táboa poderás visualizar o estado da tradución de dous aspectos de GNOME: a interface gráfica e a documentación. Seguindo a ligazón correspondente, poderás ademais visualizar o estado detallado da tradución de cada un dos módulos incluíndo tanto a porcentaxe traducida como a identificación das personas que están participando na súa tradución. Tamén verás en que fase do proceso se encontran, por exemplo se alguén reservou para sí a tradución ou se a tradución enviada está pendente de revisión.

C- Xa te presentaches? Xa recibiches a información precisa sobre como desempeñar o teu rol? Estupendo! Entón agora escolle o teu caso:

1.- Se vas axudar traducindo ou revisando, xa só che queda rexistrarte na interface de tradución de GNOME [4] e selecionar o teu rol. Unha vez que sexa activado xa poderás reservarte os módulos que che interesen e poñerte a traballar sobre iles.

2.- Se vas axudar en calquera outro aspecto sigue as indicacións que che farán chegar os membros do equipo.

Como ves, trátase dun proceso sinxelo que permite a colaboración de distintas personas cada unha traballando ao seu ritmo, segundo as súas capacidades e as súas preferencias personais. Non son necesarios complexos coñecementos técnicos senón ganas para axudar a que o noso idioma continúe presente na rede.

Así que non o dubides máis e anímate a colaborar!!

Notas do texto:

[1] gnome @ g11n.net

[2] Se non te contestamos inmediatamente por favor, non te molestes: ten en conta que podemos ter apuro polos prazos de entrega, que a xente máis activa colabora tamén noutros proxectos e... que a maioría de nós temos que compatibilizar a nosa contribución en GNOME coas nosas obrigas diarias. Lembra que o noso traballo é voluntario, cada quen fai o que pode!

[3] http://l10n.gnome.org/teams/gl

[4] http://l10n.gnome.org/register/

A nova versión de LanguageTool inclúe xa o galego

2009-11-02T15:41:00.000-08:00

Acaba de ser publicada a versión 1.0.0 do corrector lingüístico LanguageTool, que nesta nova versión inclúe por primeira vez a posibilidade de corrixir textos escritos en galego.

Esta aplicación pode usarse integrada como plug-in noutras aplicacións (por exemplo, OpenOffice.org ou LyX) ou de forma independente, como programa autónomo.

Pódese obter máis información sobre o desenvolvemento para o galego deste programa no seguinte enderezo:

http://www.g11n.net/languagetool-gl/

Fonte: http://foros.g11n.net/viewtopic.php?f=6&t=17

Ubuntu 9.10: a nosa lingua presente

2009-10-30T15:39:00.000-07:00

[Ubuntu] Grazas aos esforzos das comunidades de tradución arredor do mundo, Ubuntu está dispoñible nos seguintes 25 idiomas: español, portugués brasileño, francés, italiano, sueco, alemán, húngaro, chines simplificado, inglés, ruso, neerlandés, xaponés, portugués, finlandés, danés, catalán, checo, polaco, coreano, búlgaro, grego, esloveno, chines tradicional, euskara e galego.

Esta lista representa os idiomas que acadaron o obxectivo do que consideramos un sistema operativo traducido. Aínda así, Ubuntu está tamén dispoñible en moitos outros idiomas, con distintos graos de tradución, algúns dos que están cerca do que consideramos completo: asturiano, serbio, vietnamita, estonio, noruegues bokmål, bengalí, hebreo, guxarati e hindi.

g11n (galeguización). Comeza a andar

2009-10-25T15:38:00.000-07:00

Comeza a andar o proxecto g11n.net (http://www.g11n.net), ideado como unha plataforma que facilite a localización de software libre á nosa lingua mediante a posta en funcionamento dun conxunto de ferramentas ofrecidas á comunidade e na que, de forma autoxestionada, as decisións sexan debatidas e acordadas entre todos e todas. Para participar no proxecto non é preciso ser un experto/a informático/a, pois calquer persoa cun mínimo de interese pode facer achegas dende distintos eidos.

Das diversas propostas que teñen xurdido, identificouse a falta de xente como un dos principais problemas estructurais, común a todos os proxectos de galeguización. Para resolvelo, cremos que o sistema de foros pode ser moi útil en canto que mellora a visibilidade da comunidade no exterior..

A este efecto vimos de poñer en marcha un servizo comunitario de foros abertos, accesibel xa dende o enderezo do proxecto (http://www.g11n.net).

Temos claro que tanto a estructura do proxecto como o funcionamento dos foros son cuestións que deben ser decididas colectivamente; por eso dende o principio queremos que quede claro que a estrutura actual é só unha proposta que fazemos para que sirva de punto de partida.

A canle para tomar este tipo de decisións é o foro "Organiza" no que dende xa convidamosche a participar, con só rexistrarte nos foros. Neste sentido o rexistro é automático (non require autorización de ningún administrador, tan so activación dende unha ligazón que recibirás por correo) e dá dereito a participar no foro adicado á propia organización (os visitantes non rexistrados poderán ler, pero non escribir, cousa que si poden facer nos restantes foros).

Tal como xa fomos anunciando, a intención é montar un conxunto de ferramentas postas a disposición da comunidade, autoxestionada, e en ningún caso forma parte dos nosos obxectivos crear unha organización propia separada das demais; trátase exclusivamente crear unha estructura na que todos e todas teñamos cabida e da que poidamos facer uso libremente.

Chegados a este ponto, damos por rematado xa o proceso de posta en marcha da infraestructura básica comunitaria de g11n para facilitar a localización de software libre á nosa lingua, e comezamos os debates con dous temas básicos: a estructura dos foros e a sua política de uso.

Se che presta, rexistrate, discute e decide.

Novo servizo: foroweb

2009-10-25T15:34:00.000-07:00

Unha vez postos en marcha os servizos máis urxentes, chega o momento para comezar a poñerlle remedio ao problema estructural da comunidade de galeguización: a nosa incapacidade para atraer xente nova e incorporala ao proceso de localización. Retomando unha das propostas que xurdiran nos primeiros encontros de g11n, poñemos en marcha un foro de galeguización de fácil uso que permita rebaixar a barreira de entrada para as novas incorporacións.

Acabamos de poñer en marcha un servizo comunitario de foros abertos sobre galeguización. Como sabedes, trátase dunha das propostas que xurdiron nas nosas xuntanzas para contribuir a resolver o que identificamos como o problema estructural común a todos os proxectos de galeguización: a falta de xente. Cremos que o sistema de foros pode ser moi útil neste aspecto e tamén para mellorar a visibilidade da nosa comunidade no exterior. O servizo é accesibel xa dende o seguinte enderezo:

http://www.g11n.net/

Temos claro que tanto a estructura como o funcionamento dos foros son cuestións que deben ser decididas colectivamente; por eso dende o principio queremos que quede meridianamente claro que a estrutura actual é só unha proposta que fazemos para que sirva de punto de partida.

A canle para tomar este tipo de decisións é o foro "Organiza" no que dende xa vos convidamos a participar, con só rexistrarvos nos foros. Neste sentido o rexistro é automático (non require autorización de ningún administrador) e dá dereito a poñer comentarios, aínda que calquera visitante poderá ler os nosos debates libremente, sen estar rexistrado.

Novo servizo: repositorio comunitario

2009-10-22T15:32:00.000-07:00

Tras varios días de testaxe, intégrase o servidor adicado proporcionado pola Ciberirmandade, que comeza a hospedar os servizos masivos. O primeiro en poñerse en marcha ten como propósito facilitar o mantenemento colectivo dunha copia de seguranza dos datos e os proxectos ubicados en Mancomún: trátase do novo repositorio comunitario http://repositorio.g11n.net/

Continuando co noso propósito de fornecer recursos comunitarios que resulten útiles no contexto definido polos consensos de g11n, vimos de poñer en funcionamento un repositorio público dende o que será posíbel descargar o material que a propia comunidade decida incluir nel.

O repositorio está dispoñibel xa dende o enderezo http://repositorio.g11n.net e, tal como se pode apreciar, foi INICIALMENTE estructurado co propósito de albergar copias de seguridade ante o impacto do posibel desmantelamento de Mancomún. Atópase actualmente valeiro.

A mecánica INICIALMENTE definida para incorporar novos datos ao repositorio é a seguinte:

- Empregando unha conta ftp envíanse os datos ao servidor.
- Periódicamente, un script moverá os datos enviados a un directorio intermedio xerando sinaturas MD5 para evitar duplicidades.
- Os operadores revisarán os ficheiros para comprobar a súa integridade, ubicándoos no lugar correspondente do repositorio e modificando a súa estructura cando corresponda facelo.

Compre agora encher o repositorio. Trátase dunha tarefa colectiva, polo que deixamos creadas unha serie de contas ftp que serán entregadas a determinados individuos e colectivos (como o CESGA ou Trasno) que destacan pola súa aportación na produción dos materiais de maior valor. Ademais abrimos a posibilidade para que calquera interesado en colaborar neste proceso solicite a través da rolda comunitaria acceso ftp.

Nota: Aínda que nun principio estaba previsto fornecer contas sftp/scp, finalmente optouse pola opción ftp por entender que son públicos os datos que van integrar o repositorio.

Saude. Alexandre Prieto

Novo servizo: xestión de proxectos

2009-10-18T15:31:00.000-07:00

Mozilla, OpenOffice.org, GNOME, LanguageTool... unha xestión eficaz dos proxectos de localización mellora moito se pode apoiarse nas ferramentas adecuadas. Con este propósito desprégase esta nova ferramenta que facilitará a labor das personas responsabeis dos distintos proxectos de galeguización e mellorará a integración das iniciativas vencelladas. Trátase do servizo de xestión de proxectos de galeguización: http://proxectos.g11n.net/

Boa tarde,

Escrebo para avisar da posta en produción do servizo de xestión de proxectos de galeguización[1]. Trátase dunha ferramenta que facilitará a labor das personas responsabeis dos distintos proxectos de galeguización e que permitirá mellorar a integración das distintas iniciativas vencelladas. O enderezo para acceder a este servizo é o seguinte:

https://proxectos.g11n.net/

Como se pode apreciar é preciso autenticarse para poder empregar este servizo, o que implica dispoñer dunha conta que permita o acceso. Neste sentido a mecánica é sinxela: outórgase automáticamente conta co rol de "xestión de proxectos" ás personas responsabeis de iniciativas de galeguización que, en ausencia de obxecións, o soliciten na rolda comunitaria. Dende esa conta pode xestionarse o propio proxecto ademais de visualizar o resto dos proxectos activos para mellorar a interrelación.

Os únicos proxectos activos neste momento son os que eu xestiono de galeguización de Mozilla, OpenOffice.org e mais GNOME, así como o proxecto de adaptación para o galego do corrector lingüístico LanguageTool xestionado por Susana Sotelo.

Por suposto: novos proxectos son benvidos :)

Saúdos,

[1] Compre insistir, para tranquilidade das personas máis independentes, na idea de que non é preciso darse de alta neste servizo para participar nos proxectos de galeguización, nin siquera naqueles que estén xestionados mediante este servizo. Trátase únicamente dunha ferramenta para facilitar as tarefas de _xestión_ dos proxectos de galeguización. Explícitamente nada ten que ver este sistema nin interfire coas tarefas de tradución, revisión lingüística, escolla terminolóxica, remisión de traducións aos repositorios e similares, que continuarían funcionando exactamente igual que até o
presentebapache2-mod-wsgi.

--
http://susinho.pagina.de/

Novo servizo: roldas de correo

2009-10-17T15:30:00.000-07:00

Grazas á eficacia do traballo coordenado a traverso do IRC, en menos de 24 horas xa temos despregado un xestor de roldas de correo e o que é máis importante: unha rolda de correo comunitaria (comunidade @ g11n.net) que garante a continuidade da rincipal canle de coordenación sobre galeguigazación mesmo en caso de feche da rolda hospedada nos servidores da Xunta.

Boas,

Acaba de entrar en funcionamento a rolda de distribución de correo comunitaria instalada para minimizar o impacto do actual proceso de desmantelamento de Mancomún e o posibel feche da súa rolda g11n, que tan efectiva foi no pasado para mellorar a comunicación entre as distintas partes -ás veces contrapostas- que conforman esta comunidade. Os novos enderezos son:

Servidor: https://roldas.g11n.net/
Rolda : comunidade en g11n.net

O funcionamento é idéntico ao que xa coñecemos; entre as súas características:

- Arquivo público (procesos decisionais participativos e transparentes)
- Resposta á rolda por defecto (e non ao/á remitente, algo bastante molesto)
- Suscrición automática con aprobación (para evitar bots de spammers)
- Administración colectiva (para que todos/as poidamos dedicir)

Nuns minutos todas as personas agora subscritas rolda de Mancomún recibiredes un convite para vos inscreber nela libremente, con só clicar na ligazón web que vos chegará ao correo. Desta forma poderemos continuar comunicados aínda no caso de que se cumpran as peores espectativas.

Deixamos tamén habilitada unha réplica da rolda de Mancomún á que podedes acceder a traverso da web da nova rolda comunitaria [1]. Manteremos esa réplica actualizada para evitar que o desmantelamento de Mancomún ocasione a perda da información contida nela.

Saúdos,

[1] https://roldas.g11n.net/mailman/listinfo/comunidade

--
http://susinho.pagina.de/

Novo servizo: servidor IRC

2009-10-17T15:29:00.000-07:00

Unha vez resoltas as xestións técnicas relativas aos nomes de dominio, comeza a instalación da infraestructura, para o que se facía precisa unha canle de comunicación adecuada. Retomando a experiencia acumulada por algunhas das personas involucaradas, óptase por empregar un servidor IRC criptografado que permita realizar o traballo de administración de sistemas coa celeridade que require a situación. Ao decatarnos de que esto mesmo podía serlle útil a outros membros da comunidade, decidimos abrir o servidor a quen o queira empregar. Trátase do servidor IRC comunitario irc.g11n.net. Foi a traverso desta mensaxe;

Boas,

Dar conta da posta en marcha do servidor IRC para facilitar a celebración de xuntanzas virtuais e sesións de traballo simultáneo en grupo. Trátase dun servidor IRC estándar que ademais incorpora a posibilidade de criptografar as conversas para quen precise de maior privacidade. Para unha conexión normal, os datos son os seguintes:

Servidor: irc.g11n.net
Porto : 6667

Por defecto ocúltase a IP da conexión para evitar miradas "indiscretas". No caso de ademais querer criptografar as conversas, é preciso indicar a opción "SSL" e o porto 6670. Por exemplo empregando o irssi (cliente que recomendamos) valería a seguinte cadea de conexión:

/server -ssl irc.g11n.net 6670

Polo demais, é un servidor estándar que funciona igual que calquera outro servidor IRC, e queda prendido permanentemente. Non fai falta pedir permiso nin rexistrarse para empregalo; é un servidor público a disposición da comunidade de localización.

Saúdos,

Nota: unha vez conectado, podes unirte a unha das canles existentes ou ben crear unha nova fácilmente con /join #nome_da_canle

--
http://susinho.pagina.de/